Чанде пеш, дар шаҳри Урумчии Ҷумҳурии Мардумии Чин семинари омӯзишӣ дар мавзуи «Тиҷорати электронии фаромарзӣ ва идоракунии занҷираҳои байналмилалии таъминот», ки барои мутахассисони вазорату идораҳои Ҷумҳурии Тоҷикистон баргузор гардида буд, ба анҷом расид. Семинари мазкур ба баланд бардоштани сатҳи дониш ва малакаҳои касбии иштирокчиён, омӯзиши таҷрибаи пешрафтаи Чин ва тақвияти ҳамкориҳои иқтисодию тиҷоратии ду кишвар равона гардида буд.
Чорабинии омӯзишӣ дар шароите баргузор гардид, ки тиҷорати электронӣ ва рақамикунонии равандҳои иқтисодӣ ба яке аз самтҳои босуръат рушдёбандаи иқтисоди ҷаҳонӣ табдил ёфтаанд. Аз ин рӯ, омӯзиши таҷрибаи кишварҳое, ки дар рушди инфрасохтори рақамӣ ва тиҷорати электронии фаромарзӣ ба натиҷаҳои назаррас ноил шудаанд, барои мутахассисони тоҷик аҳамияти хос дорад.
Дар ҷараёни семинар иштирокчиён бо таҷрибаи Ҷумҳурии Мардумии Чин дар самти ташкили тиҷорати электронии фаромарзӣ, идоракунии занҷираҳои байналмилалии таъминот, логистикаи муосир ва рақамикунонии равандҳои тиҷоратӣ шинос шуданд. Ҳамзамон, масъалаҳои маркетинги рақамӣ, брендинг, таҳқиқи бозор, васеъ намудани доираи хизматрасониҳои электронӣ ва истифодаи технологияҳои муосир дар фаъолияти соҳибкорӣ мавриди омӯзиш қарор гирифтанд.
Хусусияти муҳими семинар дар он буд, ки омӯзиши масъалаҳои назариявӣ бо шиносоӣ аз таҷрибаи амалии ширкатҳо ва сохторҳои дахлдор пайваст карда шуд. Ин имкон фароҳам овард, ки иштирокчиён на танҳо дар бораи имкониятҳои тиҷорати электронии фаромарзӣ маълумоти назариявӣ гиранд, балки роҳҳои амалии истифодаи технологияҳои рақамиро дар тиҷорат, логистика ва идоракунии занҷираҳои таъминот аз наздик мушоҳида намоянд.
Дар маросими ҷамъбасти семинар мудири Маркази ҳамкориҳои тиҷоратӣ ва мубодилаи илмӣ-техникии «Син Юан» Ли Мин аз иштироки мутахассисони тоҷик дар барномаи омӯзишӣ изҳори қаноатмандӣ намуда, таъкид кард, ки баргузории чунин чорабиниҳо барои табодули таҷриба, таҳкими робитаҳои касбӣ ва рушди ҳамкориҳои иқтисодию тиҷоратии Тоҷикистону Чин заминаи мусоид фароҳам меорад.
Аз ҷониби ҳайати Тоҷикистон низ ба ҷониби Чин барои ташкили сатҳи баланди семинар ва фароҳам овардани шароити мусоид ҷиҳати омӯзишу табодули таҷриба изҳори сипос карда шуд. Мудири бахши ҳисобдории марказии Дастгоҳи иҷроияи Президенти Ҷумҳурии Тоҷикистон Зариф Искандар ва муовини директори КВД «Маркази хизматрасонии маҳфуздорандаи ҳисоботи молиявӣ»-и Вазорати молия Зарина Абдулмаҷидзода таъкид намуданд, ки дониш ва таҷрибаи бадастомада метавонад дар фаъолияти минбаъдаи мутахассисон мавриди истифода қарор гирад.
Ба таъкиди иштирокчиён, таҷрибаи омӯхташуда пеш аз ҳама барои такмили равандҳои рақамии тиҷорат, рушди хизматрасониҳои муосири логистикӣ, густариши робитаҳои иқтисодии байналмилалӣ ва фароҳам овардани имкониятҳои нав барои ворид шудан ба бозорҳои хориҷӣ аҳамияти амалӣ дорад.
Дар доираи барномаи семинар иштирокчиён аз шаҳрҳои Урумчӣ ва Сиан боздид намуда, бо фаъолияти як қатор корхонаҳо ва сохторҳои тиҷоратӣ шинос шуданд. Зимни боздидҳо ба истифодаи технологияҳои рақамӣ, ташкили равандҳои логистикӣ, идоракунии занҷираҳои таъминот ва роҳҳои пешниҳоди маҳсулот ба бозорҳои дохиливу хориҷӣ таваҷҷуҳ зоҳир гардид.
Чунин боздидҳои омӯзишӣ имконият медиҳанд, ки иштирокчиён таҷрибаи назариявии дар семинар гирифтаашонро бо фаъолияти воқеии корхонаҳо муқоиса намуда, механизмҳои самараноки истифодаи технологияҳои муосирро дар амал мушоҳида кунанд. Ҳамзамон, дар вохӯриҳо масъалаҳои рушди ҳамкориҳои тиҷоратӣ, ҷустуҷӯи бозорҳои нав, такмили хизматрасониҳои рақамӣ ва истифодаи имкониятҳои тиҷорати электронии фаромарзӣ баррасӣ шуданд.
Барои Ҷумҳурии Тоҷикистон низ рушди тиҷорати электронӣ метавонад яке аз роҳҳои васеъ намудани имкониятҳои соҳибкорон ва истеҳсолкунандагони ватанӣ барои ворид шудан ба бозорҳои минтақавӣ ва байналмилалӣ гардад. Махсусан барои соҳибкорони хурду миёна истифодаи платформаҳои рақамӣ имконият фароҳам меорад, ки маҳсулоти худро ба доираи васеи харидорон пешниҳод намуда, бо шарикони хориҷӣ робитаҳои мустақими тиҷоратӣ ба роҳ монанд.
Дар баробари ин, густариши тиҷорати рақамӣ тақозо менамояд, ки масъалаҳои сифати маҳсулот, бехатарӣ, бастабандӣ, тамғагузорӣ, мутобиқат ба талаботи бозорҳои хориҷӣ ва сатҳи хизматрасонӣ низ пайваста такмил дода шаванд. Зеро рақобат дар бозори рақамӣ на танҳо бар асоси нарх, балки аз рӯи сифат, эътимоднокӣ, суръати хизматрасонӣ ва мутобиқати маҳсулот ба талаботи байналмилалӣ сурат мегирад.
Аз ин лиҳоз, омӯзиши таҷрибаи кишварҳои пешрафта, аз ҷумла, Ҷумҳурии Мардумии Чин, барои таҳкими иқтидори касбии мутахассисон ва ҷорӣ намудани таҷрибаҳои муосир дар фаъолияти сохторҳои давлатӣ ва иқтисодӣ аҳамияти муҳим дорад. Ҳамкориҳои омӯзишӣ дар баробари рушди малакаҳои касбӣ, барои густариши робитаҳои мустақими байни мутахассисон ва пайдо намудани имкониятҳои нави ҳамкорӣ низ мусоидат мекунанд.
Дар фарҷоми семинар ба иштирокчиён сертификатҳои хатми курси омӯзишӣ супорида шуданд. Ин ҳуҷҷатҳо ҳамчун натиҷаи иштироки онҳо дар барномаи омӯзишӣ ва азхуд намудани донишҳои нав арзёбӣ гардида, барои идомаи рушди касбии мутахассисон заминаи мусоид фароҳам меоранд.
Метавон гуфт, ки семинари баргузоргардида танҳо як барномаи омӯзишӣ набуда, балки қадами дигар дар роҳи тақвияти ҳамкориҳои касбӣ, рушди иқтисоди рақамӣ ва густариши робитаҳои тиҷоратии Тоҷикистону Чин маҳсуб меёбад.

Муҳриддин ИЗЗАТУЛЛОЗОДА,

сардори Раёсати кадрҳо ва таъминоти ҳуқуқии

 Муассисаи давлатии “Нақлиёти автомобилӣ

ва хизматрасонии логистикӣ”-и Вазорати нақлиёти Ҷумҳурии Тоҷикистон